1/5/18

Dende hai moitísimas décadas reivindicouse a presenza médica permanente na illa de Ons. Mais agora, nos últimos meses, vólvese a falar diso na prensa, nos despachos dos distintos organismos oficiais e nas persoas e Asociacións relacionadas coa illa.
Estes últimos de forma expresa, senón que llo pregunten a Celestino Pardellas, están a solicitar polo menos dúas cousas relacionadas con isto:   
·         Que no PRUX (Plan Reitor de Uso e Xestión do Parque Nacional das Illas Atlánticas de Galicia) queden claras as competencias de cada organismo na Illa de Ons.
·         E que nas Illas de Cíes e Ons haxa xa a partires deste verán un Servizo Permanente de Primeiros Auxilios. 
Quixera ao respecto lembrar o papel dos mestres-sanitaros para o que recomendaría ler de novo o artigo: “Ons, o meu paraíso de onte (VI) ¿Mestre ou sanitario?” do mestre  Julio Santos Pena aparecido na revista Aunios nº 7.[1]
Máis nesta entrada quero aportar a información da solicitude en 1947, por parte da Rexedora Provincial de Divulgación da Sección Feminina, dun Botiquín para que a mestra da Illa de Ons puidera atender as urxencias facendo curas, poñendo inxeccións, etc.  
O curioso é que nestas datas non era o Xefe de Sanidade o que tiña que autorizalo senón que era o Gobernador Civil, a proposta dos concellos.
A continuación póñolles o oficio de solicitude deste trámite, ao alcalde de Bueu:




[1] Aunios nº 7 páx. 64-66 á que podedes acceder directamente neste enlace https://bit.ly/2JItBtK

14/4/18


A Garda civil de Bueu quere poñerse ‘legal’ ante a nova realidade política e colocar unha bandeira republicana na fachada do cuartel.
A menos dunha semana despois da instauración da República no ano 1931 o comandante de posto da Garda Civil de Bueu envía un oficio ao alcalde para que este lle facilite “unha bandeira lexítima Republicana” xa que mentres tanto fíxolle un apaño á monárquica que posuían. E o fai nos seguintes termos tal como transcribo:


Ao crearse este Posto foi dotado dunha bandeira monárquica costeada polo Concello desta Vila que na actualidade V. ten a honra de presidir, e como queira que á chegada da nacente República, carécese de bandeira nesta Casa-Cuartel, espero merecer da digna autoridade de V. se facilite a este Posto unha bandeira lexítima Republicana confeccionada con acordo ás disposicións vixentes, segundo me interesa a superioridade; significándolle que no comercio de Don Camilo Davila comprei no día de onte tres metros de xénero morado para arranxar a que na actualidade posuímos e podela izar por agora ata que se me facilite a que na presente lle intereso se así o acorda esa xunta municipal.
Deus que a V. m. a.
Bueu 19 de abril de 1931
O Comandante posto P.A
José García Villanueva


1/4/18



Corren tempos nos que os presos, as fugas, etc. están no día a día... E esa mesma insistencia da noticia nos medios de comunicación fixeron aflorar o documento que lles vou a presentar hoxe e que fala da primeira[1] de dúas fugas sonadas de presos do calabozo do concello de Bueu ocorrida no ano 1900.  
O oficio onde imos saber o que aconteceu ven da man do mesmo “carcereiro” cuxa explicación non sabemos se convenceu ao alcalde ou non, pois o relato parece, cando menos, un tanto novelado...
Mais véxano transcrito integramente:

Señor Alcalde municipal deste Concello de Bueu [2] ,
Matias J_xxxxx P_xxxxxx veciño desta vila e encargado por V. da custodia do que se di chamar Balbino S_xxxxxxx P_xxxxx detido no depósito municipal por vendedor de Pólvora, a V. maniféstolle: Que estando dentro de dito depósito con este individuo abalanzouse sobre min poñéndome unha navalla de afeitar ao pescozo ao que me intimidei e mentres tanto apoderouse da chave, franqueou a porta y fugouse.
O que participo a V. para o seu coñecemento e demais efectos por medio do presente que non asino por non saber. Verificándoo ao meu rogo os que subscriben en Bueu a nove de xuño de mil novecentos.
(asinan) Franco Rúa  e  José Bon

[1] Xa que, da segunda, de consecuencias funestas, ocorrida o 7 de decembro de 1936, pode lerse, cunha pequena biografía e acontecer de cada un dos fuxidos, na revista ‘Crónica da represión en Bueu’ de abril 2007, páx. 5-6, editada pola Asociación Amigos de Johán Carballeira.
[2] Miguel Nogueira Fráguas

19/3/18


O panorama político e o económico percíbense cada vez con máis sombras que luces. E para darnos unha pequena alegría, esquecéndose do pesimismo social imperante, de cando en vez, moi de cando en vez, hai que pararse a mirar pola xanela da honradez. Esta, segundo borboriña o vento, existiu. E ata hai ecos anónimos, por vergoña, que din que existe.
Para mostra un botón:
Remontémonos á primavera do ano 1932 e parémonos nas ordes que o Axudante de Mariña
lle dá aos amanuenses da mesma en canto á prohibición de aceptar calquera regalo que se trouxera a dita Comandancia, ... podendo ser sancionados, segundo a lei, o donante e receptor do mesmo...
Pois dunha infracción a esta prohibición quedou documentada cando o Sr. Axudante de Mariña da Capitanía do porto de Bueu, D. Gonzalo Torrente Piñón[1], enviou un oficio ao alcalde acompañado duns “corbelos”, manifestando que unha muller intentara regalarllos.  Pero mellor é que lles transcriba o oficio dirixido ao alcalde de Bueu:
“Por se se digna dispoñer a súa entrega a unha familia pobre desta localidade que V. teña a ben designar, teño o gusto de remitirlle o peixe que se acompaña, dos denominados “corbelos”; o cal foi entregado nesta Axudantía en concepto de obsequio para a Autoridade que subscribe, por unha muller que fuxiu ao serlle rexeitado en cumprimento ás miñas instrucións; sen prexuízo da sanción que de acordo coas leis vixentes haxa de impoñerlle cando pescude quen é a muller de que se trata.
Bueu 27 de maio de 1932.
(Selo e sinatura)  Gonzalo Torrente”

Nota: Ao dorso do documento atopámonos cunha nota manuscrita co nome da persoa á quen lle foi entregado o peixe. Era do lugar do Norte.


[1] Pai do escritor Gonzalo Torrente Ballester. Estivo na Axudantía Militar de Marina do 1935 ata 1952. No xullo de 1936 foi o militar encargado de facerse cargo do concello, depoñendo ao alcalde José Gómez de la Cueva (Carballeira)..